Кај православните верници секоја куќа е црква. Секое семејство има своја Слава и Икона како заштитничка преку која му се обраќа на Господ Бог. Семејната Слава и Икона внесуваат мир и спокој во домовите, и додека се шири мирисот на темјан во сеќавањата се појавуваат ликовите на нашите претци кои се молеле пред истите икони на нашите светци.
Должни сме им, а долгот мораме да им го вратиме на нашите деца. Иконите во нашите домови се сведоштво дека не биле залудни молитвите на нашите дедовци и прадедовци.
Иконата е светиња која кажува кој сте, што сте и од каде сте.

Изработувани со љубов и молитви упатени кон Господ, старите мајстори копаничари, фрескописци и иконописци, своето умеење низ вековите го вткајувале во гените на нашиот народ. Еден од мајсторите од новите генерации е секако и Драган Верговски - Алпи, академски сликар, виш конзерватор за мозаик, зограф за икони, мозаик и фреско живописот.